Zəhra bu gün baxçadan gələndə nənəsini ağlayan gördü. Tələsik
onun yanına qaçıb niyə ağladığını soruşanda nənəsi ona gülümsədi. Alnından öpüb
heç nəyin olmadığını dedi. Zəhra nənəsini yaman çox istəyirdi. Atasının
yoxluğunun həsrətini, anasının küsgün dünyasının niskilinin təsəllisini yalnız
nənəsinin həlim nəfəsində tapırdı. Zəhranın anası əynini dəyişdi, ona yemək
verdi, axşam saatlarında televizorda “Xəbərlər” proqramının vaxtı idi. Nənəsi tələsik
televizorun səsinin açdı, diqqətlə qulaq asmağa başladı. Zəhra yan otaqda idi.
O öz gəlinciyi ilə söhbət edirdi. Bu gəlincik onun atasının ona almış olduğu
yeganə hədiyyə idi. “Bu gün cəbhə xəttində vəziyyət gərginləşib. Düşmən
ordumuza atəş açıb. Bir neçə saat davam edən qızğın döyüşlərdə cavab atəşi ilə
düşmən xeyli itki verərək susdurulub. Çox böyük kədərlə qeyd etmək istəyirəm
ki, bu döyüşlərdə Azərbaycan ordusunun 15 əsgəri şəhid olmuşdu...”.
Qonca nənə bu xəbəri eşidər – eşitməz dizlərinə döyə - döyə ağlamağa başladı. Zəhra
nənəsinin səsinə otaqdan çıxdı. Amma nə olduğunu soruşmadan yerindəcə dayandı.
Televizyada şəhid olan əsgərlərimizin adlarını deyirdilər. Hər şəhidin adını
dedikcə Qonca nənə dizinə vururdu. Zəhranın kiçik gözlərindəki böyük kədər
sezilirdi. Axı Zəhra atasının şəhidlik xəbərini anasının bətnində olarkən
almışdı. Atasından ona qalan yeganə hədiyyə olan gəlinciyi isə atası hərbə getməzdən
bir gün öncə alıb anasına vermişdi. “Ürəyimdən qız keçir, al bunu, həyatı bilmək
olmaz. Işdi gələ bilməsəm bunu qızımıza verərsən. Atan vətən uğrunda getdi və cənnətdə
onun necə böyüdüyünü görəcəyimi deyərsən. Səni və balamızı çox sevirəm. Yox əgər
oğlum olsa ona mənim əsgər paltarımı verərsən” .
Bu, Zəhranın atasının anasına dediyi son sözləri idi. Zəhra sanki atasıyla
danışırmış kimi hər gün o gəlinciklə söhbət edirdi.
O, kiçik addımlarla nənəsinə yaxınlaşdı: “Nənə, onlar da atamın yanına getdilər?”
– Yaşla dolu gözləri ilə nənəsinə baxdı. Amma o, cavab gözləmirdi, atasının nəfəsini
nənəsindən almaq üçün onu sakitləşdirməyə gəlmişdi.
Qonca nənə Zəhranı bağrına basdı. Göz yaşları sel olan şəhid anası bu gün ölən
şəhidlərin anaları üçün də ağlayırdı.
Bir neçə gün keçdikdən sonra Zəhranın təkidi ilə Qonca nənə şəhid oğlunun məzarının
ziyarətinə getdi. O, atasının məzarı ilə hər dəfə görüşə gedəndə gəlinciyini də
özü ilə apardı. Qonca nənə oğlunun məzarının başına dolanır, onunla danışır, ürəyini
boşaldırdı. Amma ağlamırdı, kövrəlib susurdu, başıını uca tuturdu, sanki gözəl
bir gəlmiş kimi ümidlə dayanırdı.
-Nənə, niyə atamın yanına gələndə bu qədət sert olursan, gözlərindən yaşda gəlmir?
Zəhra yarışıltaq, yarıciddi nənəsindən sordu.
-Mənim ciyərparəm, bir bura bax, gör nə qədər şəhidimiz var. Deməli, biz varıq,
Vətənimiz var. Mən o vaxt bura gələndə ağlayardım ki, bura bos qalardı. Vətəni
vətən edən onun şəhidləridi.
Zəhra aldığı cavabdan məmnun idi. Onlar dualarini da oxuyub yavaş – yavaş evə
qayıtmağa doğru yol aldılar. Birdən yan sıra qəbrlərin arasında üstü bayraqla
örtülmüş yeni qəbr gördülər. Zəhra nənəsinin əlindən çıxıb o qəbrə tərəf getdi.
Orda bir molla dayanmışdı. O molladan bu qəbrin niyə belə olduğunu soruşdu.
Molla isə burda yatan əsgərin bir neçə gün öncə ölənlərdən birinin olduğunu
dedi. Zəhra qəribə oldu. O bütün gecə düşündüklərini şəhidə danışmağa başladı
- Salam, əsgər, necəsən? Çoxmu canın yandı? Bilirsən, əsgər, sən ölərkən mən
evdə idim, şirin bir yuxuda, atamın aldığı gəlinciklə yatmışdım. Mən
arzularımla baş – başa idim. Səhər açıldı, axşam düşdü, heç nədən xəbərsiz yemək
belə yedim. Sonra televizoru açdım, ordakı xala dedi ki, sənə güllə vurublar.
Əsgər, axı, mən hardan bileydim ki, bu gecə sənin anan yata bilməyib? Bu qızmar
yay günündə qalın yorğana bürünüb: “Allahım, bu nə soyuqdu belə? Sanki sümüklərimə
buz çöküb, elə bil vucudum soyuyur? ”
Axı mən hardan bileydim ki bu gecə nədənsə atan da yata bilməyib, elə hey səsini
duyub, elə bil onu çağırırsan deyə dəfələrlə əlini telefona atıb. Ürəyinə bir
ağırlıq çöküb? Mən hardan bileydim ki, bu gecə sevdalılar nigaran qalıb, aşiqləri
ilə yuxuda vidalaşıb. Mənim atamın yanındasan, əsgər? Bilirəm ordasan. Mənim
atam çoxdan gedib ora. Deyəsən uzaqdadı, neçə gündü ki yuxuma gəlmir. Indi
anlayıram ki, o sizin yanınızda olub. Ona görə mənim yuxuma gəlməyib. Nə olar əsgər,atama
de ki, ondan küsmürəm gəlsin. Bax söz verirəm bir daha ona yanımda qal deməyəcəm.
Yetər ki yuxularıma gəlsin...”
Qonca nənəni qəhər boğmuşdu. O Zəhranın əlindən tutub getmək istəyəndə gördü
ki, cavan bir xanımla ele Zəhra yaşlarında bir qız gəldi. Sən demə bu uşaq da,
bu məzardakı şəhidin balası imiş. Bu göyçək qız uşağı sual dolu baxışlarla Zəhraya
baxdı. Zəhra qızdan şəhidin balası olduğunu öyrəndikdə ona dedi: “ Bilirsən, mənim
atam da şəhid olub. Indi onun yanından gəlirik. Bilirsən, mənim atam hər gecə
yuxuya gedən kimi yanıma gəlir. Mənlə söhbət edir. Sənin də atan gələck.”
Qonca nənə Zəhranın əlindən tutub evə apardı. Amma onlar burda ən çox sevdikləri
birini qoyub getdilər. Qonca nənə tək balasını, Zəhra isə yalnız yuxularda
gördüyü atasını... Və... görün neçə - neçə əzizlər sevdiklərini məzara qoyur bu
vətən üçün.