Bakü-tebriz

Bakıdan Təbrizə yazılan sevgi şeiri…

Mən də darıxıram… səndən də betər…

Gəl bunu xəbər al özümdən mənim.

Bu qədər ayrılıq çox oldu, yetər,

Yəqin hiss edirsən sözümdən mənim…

Ağlım sən tərəfdə qalıbdı deyə,

Bu həsrət canımı alıbdı deyə,

Araya ayrılıq salıbdı deyə, 

Araz da utanır üzümdən mənim…

Yolum nə vaxt sənə güzar edəcək?

Allah görən  bizə nəzər edəcək?!

Arazı döndərib Xəzər edəcək…

O qədər yaş axır gözümdən mənim…

Nə olsun çətindir hər ikimizə, 

Alışıb dözürük dərd yükümüzə…

Məsafələr əngəl olsa da bizə….

Yenə tanıyarsan  izimdən mənim…

Allahdan tək səni dilərəm , vallah, 

Sonda ölüm varsa ölərəm vallah,

Sürünə -sürünə gələrəm, vallah,

Axsa əcəl qanı dizimdən mənim….

Dr.İlhamə Müslümova