Səni  tapana  qədər  dünya  necə  böyükmüş,

   Səni  axtarmaq  üçün  illəri  ötürmüşəm…

   Nə bileydim  bu sevgi mənim könlümə yükmüş, 

   Özüm  öz xoşum   ilə boynuma  götürmüşəm…

   Baxmamısan  gözümün  sel- suyuna, yaşına, 

   Qoymamısan ki, qonum  sizin  elçi  daşına…

   Qırmızı  bir  ip  salıb  ürəyimin  başına 

   Qurbanlıq  olsun  deyə  qapına  gətirmişəm…

   Zikr  edərək  çəkmişəm  gündə  yüz  yol  adını,

   Sevmişəm  qüsurunu, sevmişəm inadını… 

   Elə  almısan  mənim  gözlərimin  odunu, 

   Bütün  qohum-tanışla  dostluğu  bitirmişəm….

   Səni  tapandan  sonra  sanırdım  şad  olaram, 

   Bilmirdim  belə miskin, belə  bərbad  olaram…

   Nə  bileydim  gün  gələr  özümə  yad  olaram?((

   Səni  tapandan  sonra  özümü  itirmişəm….