Yoruldum

Bu  eşq  daha  el  içində  utanır, 

Söküyünü yamamaqdan  yoruldum…

Dedim, bəlkə ağıllanar, düzələr…

Səni  hər  gün  sınamaqdan yoruldum…

Hey  ötəri  həvəslərə  qaçmısan, 

Yüz  xəyalın  qanadında  uçmusan…

Ürəyimdə  elə  yara  açmısan, 

Vallah….hər  gün  qanamaqdan yoruldum…

Yollarına  gül-çiçəyi  sərirdim, 

Əvəzinə  tikanları  dərirdim,

Hər  keçən  gün  yüz səhvini  görürdüm, 

Səni  belə  tanımaqdan  yoruldum…

Niyə  yandım  bu  atəşin  qoruna?

Niyə  belə  inandım kor-koruna ? 

Niyə  axı düşdüm  sənin toruna ?!

Mən özümü  qınamaqdan  yoruldum….

Dr.İlhamə Müslümova